Ruud Basten
Wae gaon uch vuuer ónger miene spreuk:

” NEET ACHTER DE KRAAN MER DRAAN! “

Prins Ruud II

Ich bèn Ruud Basten 28 jaor jónk. Eine geboeare en getoeage Thoearder jóng. Ich woean drek naeve Aod Thoear, same mèt mien vriendin Karlijn en mien noe al vastelaovesgekke dochter Myrthe. Zoon van John Basten en Carine van Pietje van Stienen en broor van Roel.

Ich bèn wirkzaam bie VDL es constructeur en daonaeve staon ich ouch geregeldj bie Aod Thoear achter ’t befèt.

Miene vrieje tied höb ich ouch aardig opgevöldj. Zoea bèn ich actief bie bc Thorn, zvv Amicitia, sjötterie st. Michaël, dc Aod Thoear en fc Maasgouw.

Hieël gaer stèl ich mien Adjudante en Kössemeister aan uch vuuer.  Ich dink det geine Prins vuuer mich zoeaväöl ervaring naeve zich haet gehadj es ich noe höb. Allerieërst mien Adjudante. Mien breurke Roel Basten, deze jóng is noe al vuuer de 5e kieër Adjudant. Hae voetbaltj in Itter, gae kèntj hum herkènne aan dae wage van Veritas (nummer 8) .

Miene angere Adjudant is ouch eine bekèndje inne Thoearder vastelaovendj. Aod Jeugdprins Nicky I Parren. Dae mót op zóndig ein voetbaltes van fc Maasgouw inpakke.

Natuurlik is dit plaetje neet compleet zónger eine Kössemeister. Deze jóng haet de meiste deenstjaore achter de rök bie de Geitebuk, al is der pas 20 jaor. Toen der 8 jaor waas höb ich hum Jeugdnar vanne Geitebuk gemaaktj. Dit haet hae 4 jaor gedaon. Nao die 4 jaor waas der de vastelaovendj neet meug en waerdje ouch hae Jeugdprins. Miene Kössemeister is nemes minder es Yvo Craemers.

Wae zeen der gruuets op det wae de ker moge trèkke deze vastelaovendj. Echter kènne wae dit neet zónger de hulp van uch.